BRON I 50,000 O YMWELIADAU Â PHARC GWLEDIG BRYNGARW DROS WYLIAU'R HAF

Croesawodd Parc Gwledig Bryngarw bron i 50,000 o bobl yn ystod mis Gorffennaf ac Awst 2026, wrth i deuluoedd ac ymwelwyr eraill wneud y gorau o'r fan hardd ym Mhen-y-bont ar Ogwr dros wyliau haf yr ysgol.

Cofnodwyd bron i 24,000 o ymweliadau ym mis Gorffennaf, ac yna bron i 26,000 o ymweliadau ym mis Awst, gan nodi un o'r tymhorau prysuraf i'r gofod gwyrdd arobryn ers pandemig Covid.

Wedi'i reoli gan Ymddiriedolaeth Ddiwylliannol Awen mewn partneriaeth â, ac ar ran, Cyngor Bwrdeistref Sirol Pen-y-bont ar Ogwr, mae dros £1 miliwn wedi'i fuddsoddi ym mhrofiad ymwelwyr a seilwaith Bryngarw yn ystod y blynyddoedd diwethaf.

Mwynhawyd ardal chwarae newydd sbon i blant Bryngarw, a ail-ddatblygwyd yn ddiweddar diolch i gyllid a chefnogaeth gan y Cyngor, gan filoedd o ymwelwyr ifanc yn ystod eu gwyliau haf.

Dywedodd Richard Hughes, Prif Weithredwr Awen: “Roedd yn wych croesawu cymaint o bobl i Barc Gwledig Bryngarw dros wyliau’r haf, gan ddangos faint mae’r parc yn cael ei werthfawrogi gan gymunedau lleol ac ymwelwyr o ymhellach i ffwrdd.

“Boed pobl yn dod i fwynhau diwrnod allan gyda’r teulu, cwrdd â ffrindiau, archwilio’r parc, cymryd rhan yn un o’n gweithgareddau diwylliannol dan arweiniad ceidwaid neu weithgareddau diwylliannol awyr agored, neu dreulio peth amser yn yr awyr agored, rydym yn gobeithio bod pawb wedi mwynhau eu hymweliad.

“Hoffem ddiolch i’n tîm ceidwaid gweithgar, cydweithwyr yn y caffi a’n gwirfoddolwyr am helpu i gadw Bryngarw yn lle diogel a hygyrch i bawb, yn enwedig yn ystod y tywydd poeth iawn a gawsom yr haf hwn.

“Mae’r nifer fawr o ymweliadau teuluol dros yr haf yn dangos bod Bryngarw yn parhau i ddarparu lle croesawgar a chynhwysol lle gall plant chwarae, archwilio a chysylltu â natur. Mae’r ymweliadau hyn yn cefnogi ffyrdd o fyw egnïol ac iach, yn rhoi cyfleoedd i bobl dreulio amser o safon gyda’i gilydd a chreu atgofion parhaol.

“Mae Parc Bryngarw yn enghraifft ardderchog o sut mae ein partneriaeth â Chyngor Bwrdeistref Sirol Pen-y-bont ar Ogwr yn cynhyrchu buddsoddiad ac yn cefnogi lles ac economi ymwelwyr.”

Ychwanegodd Dirprwy Arweinydd Cyngor Bwrdeistref Sirol Pen-y-bont ar Ogwr, Jane Gebbie:

“Mae bron i 50,000 o ymweliadau mewn dim ond dau fis yn dweud un peth wrthym yn glir – mae pobl wrth eu bodd â Pharc Gwledig Bryngarw!

“Dyma’n union pam rydyn ni’n buddsoddi mewn lleoedd fel Bryngarw. Mae gweld teuluoedd yn mwynhau’r parc, plant yn chwarae yn yr ardal chwarae newydd wych a phobl yn mynd allan, yn egnïol ac yn cysylltu â natur yn wych.

“Rydym wedi buddsoddi mwy na £1 miliwn ym Mryngarw yn ystod y blynyddoedd diwethaf, ac mae'r ffigurau ymwelwyr hyn yn dangos bod y buddsoddiad yn dwyn ffrwyth. Mae hwn yn barc i bawb, ac mae'n wych gweld cymaint o bobl yn ei fwynhau.

“Rwy’n hynod falch o’r hyn rydyn ni’n ei gyflawni ym Mryngarw, ac mae niferoedd yr haf hwn yn rheswm gwych i ddathlu. Rydyn ni’n rhoi rhywle i bobl greu atgofion – ac yn amlwg, maen nhw’n dod yn ôl am fwy!”